mar 14 2011
Euskaraz Bizi Eguna ospatuko du EHEk martxoaren 19an Gernika-Lumon
Euskal Herrian Euskaraz (EHE) erakundeak Euskaraz Bizi Eguna 2011 antolatu du Gernika-Lumon (Bizkaia) datorren martxoaren 19rako, “euskaraz bizitzearen aldeko hautua indartzeko eguna”, hain zuzen ere, kolektiboko ordezkariek Donostian eskainitako agerraldian zehaztu dutenez.
Euskaraz Bizi Egunaren bidez, jaia eta aldarrikapena uztartuz, EHEk “zapalkuntzari aurre egin eta Euskal Herri euskalduna eraikitzeko bidera hurbildu nahi ditu herritarrak”.
Kolektibo euskaltzalearen ustez, “garai latzak bizi ditu” herri euskaldunak, eta euskararen aurkako erasoak “etengabeak” direla salatu dute. “Hizkuntza-ordezkapena oinarrian duen mendetako asimilazio prozesuaren ondorioz frantsesa eta gaztelera ditugu hizkuntza nagusi Euskal Herrian, euskara eta euskaldunok menpeko bihurtuz. Ezin gara euskaraz bizi, euskararen herrian bertan”, kritikatu dute.
Horrela, “euskaraz bizitzeko hautua egin” eta euskarari “lehentasuna” eman behar zaioal nabarmendu dute, “norbanakotik hasita”. Halaber, “lehentasunezko estatusa” eskatu dute euskararentzat Euskal Herri osoan.
Ildo horretan, “Euskal Herri euskaldunaren bidean urrats bat gehiago eman eta euskaraz bizi den herriaren erakusleiho izan nahi du” Gernika-Lumon ospatuko den Euskaraz Bizi Egunak. Auzolanetik abiatutako egitarau zabala prestatu da horretarako. Pasealekuaren inguruan bilduko da eguna, eta goizeko 11:00etatik aurrera erakusketak, kale animazioa, soka-tira saioa, “IEE.EHE” dokumentalaren emanaldia, pegatinen erakusketa, euskalgintzaren azoka eta abar egongo dira.
Eguerdian, urtero bezala, ehunka pertsonarentzako herri-bazkaria izango da; aurten baina, bertso-bazkaria izango da, eta Igor Elortzak, Onintza Enbeitak, Ander Elortegik eta Beñat Ugartetxeak hartuko dute parte bertan.
Arratsaldean “Sasi guztien gainetik euskaraz bizi!” goiburupean manifestazioa egingo da, eta bukaeran, ekitaldia. Iluntzean, aldiz, kontzertuek hartuko dute lekukoa: Betagarri eta Sarkor arituko dira lehenik oholtza gainean, eta ondoren erromeria egongo da Joxpa taldearekin
Etiquetas todos los blogs: euskara ;
